Yanacağın tam bitməsi çox vaxt diqqətsizlik kimi qiymətləndirilir, halbuki səbəblərin böyük hissəsi başqadır: səhv işləyən göstərici, gözlənilməz tıxac, bağlı yanacaqdoldurma məntəqəsi və ya sadəcə uzun yolda səhv hesablama. Nəticə isə eynidir — avtomobil hərəkət zolağında dayanır və vəziyyəti idarə etmək lazım gəlir.

Mühərrik dayanmazdan əvvəl siqnallar var

Yanacaq tükənəndə mühərrik birdən sönmür. Əvvəlcə güc itkisi hiss olunur, avtomobil sanki qaz pedalına gec cavab verir, sonra qısa təkanlar başlayır. Bu əlamətlərin ilkində dərhal sağ zolağa keçin.

Bu, ən dəyərli otuz saniyədir. Mühərrik hələ işləyərkən sükan gücləndiricisi və vakuum əyləc gücləndiricisi işləyir; mühərrik sönəndən sonra sükan ağırlaşır və əyləc pedalı bərkiyir. Kənara çıxmaq üçün həmin qısa müddətdən istifadə edin.

Dayandıqdan sonra ilk addımlar

• Avarici işıqlar dərhal. Bu, ətrafdakılar üçün ilk xəbərdarlıqdır.
• İnersiyadan istifadə edin. Avtomobil hələ hərəkətdədirsə, onu mümkün qədər kənara sürüşdürün.
• Xəbərdarlıq üçbucağı. Şəhərdə otuz metr, magistralda yüz metrə qədər.
• Sərnişinlər çölə. Barýerin arxasında, hərəkət zolağından uzaqda gözləsinlər.

Nədən çəkinmək lazımdır

Ən yayılmış səhv mühərriki təkrar-təkrar işə salmağa çalışmaqdır. Yanacaq yoxdursa, bu cəhdlər heç nə verməyəcək, amma akkumulyatoru boşaldacaq və vəziyyəti daha da mürəkkəbləşdirəcək. Bundan əlavə, yanacaq nasosu quru işləyəndə zədələnir — nasos yanacaqla soyudulur, yanacaq yoxdursa qızır.

Piyada yanacaq axtarmağa getmək də təhlükəlidir. Magistral yolda kənarla yerimək statistik olaraq ən riskli hərəkətlərdən biridir, xüsusilə gecə. Avtomobilin yanında qalmaq, görünən yerdə olmaq və yardım gözləmək daha düzgündür.

Kanistr məsələsi

Yanacağı özünüz gətirmək qərarına gəlsəniz, yalnız yanacaq üçün nəzərdə tutulmuş sertifikatlı kanistrdən istifadə edin. Adi plastik butulka və ya su qabı statik elektrik yığır və bu, yanacaq buxarı ilə birlikdə real yanğın riski yaradır. Yanacaqdoldurma məntəqələrinin əksəriyyəti belə qablara doldurmaqdan imtina edir və bunda tam haqlıdırlar.

Doldurarkən kanistri yerə qoyun, avtomobilin baqajında və ya kuzovunda saxlamayın. Yer səthi statik yükü boşaldır, izolyasiya olunmuş səth isə əksinə yığır.

Dizel avtomobillərdə vəziyyət fərqlidir

Benzinli avtomobildə yanacaq əlavə etmək adətən kifayət edir. Dizeldə isə sistemə hava düşür və çox vaxt bunu ayrıca çıxarmaq lazım gəlir. Bəzi modellərdə bu proses avtomatikdir, bəzilərində isə əl nasosu və ya servis müdaxiləsi tələb olunur.

Buna görə dizel avtomobili tam boşaltmamaq xüsusilə vacibdir. Göstəricinin son çərəyində yanacaq doldurmaq vərdişi həm nasosun ömrünü uzadır, həm də bu problemin qarşısını tamamilə alır.

Təkrarlanmanın qarşısını almaq

Ehtiyat həddini özünüz üçün müəyyən edin: göstərici çərəyə çatanda doldurun, sıfıra yaxınlaşmasını gözləməyin. Uzun yola çıxmazdan əvvəl marşrut üzərindəki məntəqələri yoxlayın — bəzi istiqamətlərdə aralar yüz kilometrdən çox ola bilər və gecə saatlarında hamısı işləmir.

Göstəriciyə nə qədər etibar etmək olar

Yanacaq göstəricisi dəqiq ölçü cihazı deyil. Bakın içindəki üzgəc çənin formasına görə hərəkət edir və xüsusilə yarıdan aşağı hissədə xətası böyüyür. Yoxuşda, enişdə və kəskin döngədə yanacaq bir tərəfə axır, göstərici isə bunu anında əks etdirir — buna görə eyni yolda rəqəm bir neçə dəfə dəyişə bilər.

Ehtiyat lampası yanandan sonra qalan məsafə də modeldən modelə ciddi fərqlənir: bəzi avtomobillərdə əlli kilometr, bəzilərində isə yüzdən çox. Bu rəqəmi təxmin etməyin, istismar kitabçasından öyrənin və ondan da ehtiyatla istifadə edin.