Niyə plan üzrə baxım təsadüfi təmirdən ucuzdur?

Avtomobilin istismar xərclərinin böyük hissəsi gözlənilməz nasazlıqlardan yaranır və bu nasazlıqların əksəriyyəti vaxtında aparılmayan sadə yoxlamaların nəticəsidir. Vaxtında dəyişdirilməyən mühərrik yağı sürtünmə səthlərini korlayır, köhnəlmiş əyləc mayesi uzun enişlərdə əyləc pedalının boşalmasına səbəb olur, çirklənmiş hava filtri isə yanacaq sərfiyyatını on faizə qədər artırır. Plan üzrə baxım məhz bu zənciri qırır: kiçik və ucuz əməliyyat böyük və bahalı təmirin qarşısını alır.

Hər ay yoxlanmalı olanlar

Ayda bir dəfə, mütləq soyuq mühərrikdə və düz səthdə dayanmış avtomobildə beş dəqiqəlik yoxlama aparın:

• Mühərrik yağının səviyyəsi və rəngi - tünd qara, qatılaşmış və yanıq iyi verən yağ dərhal dəyişdirilməlidir;
• Soyuducu mayenin genişlənmə çənindəki səviyyəsi minimum və maksimum nişanları arasında olmalıdır;
• Dörd təkərin və ehtiyat təkərin təzyiqi - göstərici sürücü qapısındakı etiketdə yazılıb;
• Şüşəyuyucu mayenin həcmi və silgəc lentlərinin vəziyyəti;
• Bütün xarici işıqlar: yaxın və uzaq işıq, dönmə siqnalları, stop-siqnal və arxa duman işığı.

Mövsümi baxım: yaz və payız

İldə iki dəfə, mövsüm dəyişəndə avtomobili daha dərindən yoxlatmaq lazımdır. Payızda əsas diqqət akkumulyatorun tutumuna, şam və alışdırma sisteminə, antifrizin donma temperaturuna və qış təkərlərinin protektor dərinliyinə yönəldilir - qış təkəri üçün minimum dörd millimetr qəbul edilən həddir. Yazda isə kondisioner sistemi, əyləc diskləri və qış boyu duz təsirinə məruz qalmış kuzov altlığı yoxlanılır. Bu iki baxış il ərzində yaranan nasazlıqların böyük hissəsini əvvəlcədən aşkarlayır.

Yağ, filtr və mayelərin dəyişmə intervalı

Mühərrik yağı və yağ filtri adətən hər on min kilometrdə və ya ildə bir dəfə - hansı əvvəl gəlirsə - dəyişdirilir. Şəhərdaxili sıx hərəkətdə istismar olunan avtomobillərdə bu interval yeddi min kilometrə qədər qısaldılmalıdır, çünki dayan-get rejimi yağı daha sürətlə köhnəldir. Salon filtri ildə bir dəfə, hava filtri iki ildə bir, əyləc mayesi isə iki-üç ildə bir dəyişdirilir. Ötürücü qutu yağı üçün istehsalçının təlimatına baxmaq şərtdir, çünki interval modeldən modelə ciddi fərqlənir.

Nələri özünüz etməməlisiniz?

Yağ səviyyəsinə baxmaq, silgəc dəyişmək və ya şüşəyuyucu doldurmaq hər sürücünün öhdəsindən gələ biləcəyi işlərdir. Lakin əyləc sistemi, sükan mexanizmi, təhlükəsizlik yastıqları və elektronika ilə bağlı hər hansı müdaxilə mütləq servisdə aparılmalıdır. Səhv quraşdırılmış əyləc altlığı və ya düzgün sıxılmamıq təkər boltu birbaşa həyat təhlükəsi yaradır. Yollda mütəxəssisləri bu cür yoxlamaları ünvanınıza gələrək həyata keçirir və nasazlıq aşkarlandıqda ən yaxın etibarlı servisə yönləndirir.